Won ich am erschte Tag in Hamburg bin,
Schtiig ich im Hbf usem ICE
Und gschpüür i minere Furzchuchi drin
Urplötzlich eis Rumore - o herrje!
Will i dem D-Mark-Zuug mit miine Fränkli
Ich mir käs Semmeli ha chöne chauffe
Und Tüütschi sich nie abelönd zu Gschänkli...
- Vor Hunger fangt mis Hirni aa hochtuurig laufe:
So leer ich hurtig rasch en Bankomat,
Träg s’Nöötli ine Beckerei, wo „gar nicht fern“,
Ich reich’s em Frolein wo da schaht
Und säg: „Ein Eingeklemmtes hätt ich gern.“
Sie luegt ganz strub uf ihres Wallholz und meint glasse:
„Na, junger Mann, dass könn’se hier schon hamm!“
um mir grad uf der Stell das Iklämmti z’verpasse
und quätscht mich zwüsche Tür und Angel winen Schwamm.
Ich bin verdutzt, verschtupft und ganz verchlöpft
Das men in Tüütschland eme ehrliche Begehre
Nöd schtattgitt, sondern eim fascht chöpft,
Dass me sich nur duren Siiteschprung cha wehre.
Won ich dem Gschöpf dänn ändlich klar chan mache
Dass iich es Broot will, in zwei Teili gschpalte
Dezwüschet öppis iiklämmt – jetzt nöd lache! -
Demits chan Anke, Chääs und Sänf enthalte,
Da seit si fräch mit irem blonde Wuschelzopf
Ich welli also doch sii iichlämme – si heissi „Anke“.
Ich säge, nei, „Anke heisst bei uns der Butter, du armer Tropf“
- es klärt sich vill, doch ich säg nonig „Danke“.
So schtoossemer dänn vor zum Innerlichschte:
Das nämli, wo als kaseus inter panibus
E interpanetari Exischtänz söll frischte.
Doch schnäll wird klar: Bi Chääs chunt die Frau ohni Aahnig uus...
und leit mir prompt en Chääs ii ohni Löchli
- Es isch fruschtrierend, wien im höche Norde
sich nienet Freirüüm bildet, alls verröchlet,
schtatt dass Kultur entschtaht und überbordet!
Doch nei. - Ich zahle s’Pack; si frögt de nächschti Chund;
Ich packe uus, und schtuun!: Wo Chääs sött sii isch Wurscht!
Verbittret über sovil Unverschtand wird’s mir „zu bunt“:
Was ich i miim Iiklämte han isch mir nöd Wurscht!
Si nimmts Brot zrugg, lupft süüferli de Deckel
Git d’Wurscht me Hund wo lang scho gwartet,
Schniidt homogeni Schiibli ab vom Gouda-Steckel
Und mit me Blick, wo langsam dureschtartet,
sticht si das Wallholz unzart schwunghaft us de Hüfte -
is Hüüfli Brot und Anke, Chäs und Brot
und perforiert, und seit dänn „Nun ist durchgelüftet“,
nur s’Iiklämmti liit da verrupft und tot.
Uf Sänf han ich dänn grosszügig verzichtet
Han s’Sändwich aagluegt und mit Wiisheit mich umgarnt:
De Hunger jedefalls, de isch vernichtet,
Und vor Fraue us em Norde bin iich jetzt gwarnt.
Rechtlicher Hinweis: Alle Rechte sind ausschließlich beim Autoren.